وصل الإعتصام لليوم السادس والأربعين .. وبالتالي ما كان في بدايته من "تكبير للدماغ" أصبح من المسموح .. وبدأت أتكلم مع الأصدقاء والأقارب المحتارين سواء في تصنيفنا أو مساندتنا..ولازلت على رأيي..لا ننتظر تعاطفا ولا مساندة..لأن الموقف الآن يحتاج من يقتنع بالقضية إقتناعا تاما وليس مجرد متعاطفا أو مساندا على إستحياء، لأنها معركة ثبات وصبر.
تلخيصا هذه هي النقاط الرئيسية التي يتكلم عنها الناس، وردي عليها:
نقاش أول:
إنتو مسلحين ؟
- لأ
إزاي، أومال الظابط اللي اتقتل عند الحرس والتاني اللي اتقتل عند المنصة ؟
- وهو لو احنا مسلحين حنقتل ظابط واحد بس وبعديها نتقتل بال84 وال200 ؟ بالدماغ كده طالما معانا سلاح نكمل ونقلبها دم..وبعدين فين الجنازة العسكرية وتقرير الطب الشرعي والنيابة ؟ ولا صعب عليهم ؟ وفين أهل العسكري يتاجروا بدموعهم شوية والإعلام يجيبهم يعمل حفلة عليهم "ومنهم لله الإخوان اللي قتلوا ابننا" ؟ ده لو فيه ظابط إتقتل فعلا !
- وبعدين يا أخي نفترض إن فيه حد دسيسة بيننا أو حتى معتصم (برغم التفتيش) معاه سلاح ودخل ضرب رصاصة واحدة قتلت ظابط واحد (الرواية اللي مالهاش أي دليل غير رواية الداخلية) !! بس نصدقهم عادي...المهم لو صدقوا فعلا..فهل جزاء قتل واحد من واحد ظهر واختفى إنهم يقتلوا 200 و 84 غير المصابين ؟!
- وبعدين هي عربيات الأمن المركزي مع البلطجية عند المنصة بكامل أسلحتهم كانوا موجودين هناك في نفس توقيت المسيرة بمناسبة إيه ؟ بيتمشوا ؟
- إنت فعلا مصدق إن وجود كل القوات دي هناك صدفة وقتلهم للمتظاهرين كان ردا على شخص مجهول ظهر واختفى .. وكل مرة يظهر يقتل واحد ويختفي ويتسبب في قتل العشرات ؟ ده مين إبن اللذينة الجامد ده ؟ مصدق فعلا ؟ خلاص يا معلم صدق.
أيوة بس إنتو قطعتوا الطريق وبنيتوا سور وبوظتوا الرصيف وبنيتوا سور على كوبري أكتوبر !
- هو إنت شفت أي صورة لسور على الكوبري ؟
لا
- طب بتقول كده بمناسبة إيه ؟ أنا كنت هناك بعد الضرب ييجي بنص ساعة أو أكتر ولما وصلت كان السور لسه بادئ يتبني .. وكنت بساعد في توصيل الطوب كمان...
يعني كمان بتساعد على قطع الطريق ؟!
- يا أخي مش قطع طريق بقوللك أنا وصلت بعد الضرب بنص ساعة..عارف لقيت إيه لما وصلت لقيت ضرب نار حي وغاز وخرطوش وآلي..مستخسر ف الناس إنهم يبنوا سور يتحاموا فيه ؟ لا تعليق
طب بالنسبة للنهضة..مسلحة وأنا متأكد...
- ماعرفش مارحتش النهضة..بس اللي أعرفه إن وقت الثورة ف ال18 يوم كان اللي معاه سلاح بينزل تحت بيته يحميه بسبب التسيب الأمني والبلطجية يوم 28 يناير اللي اتمسكوا بسلاح ف التحرير ماتوا م الضرب وكان على قلبنا زي العسل عشان ثورة الشباب الطاهر لكن الإخوان والإسلاميين يتقتلوا عادي جدا مايدافعوش عن نفسهم برغم التسيب الأمني المتعمد ضدهم ف النهضة وأي مسيرة...بالذات إني كنت هناك أول يوم الإعتصام وشفت بلطجية ف شارع بين السرايات وحذرنا منهم...
أيوة بس هما كده بيفقدوا تعاطفي معاهم لما يستخدموا سلاح ولو بدافع الدفاع عن النفس..يموتوا بس مايستخدموش سلاح..
- لا ماهما عندهم يدافعوا عن نفسهم ويعيشوا أفضل وأولى من تعاطفك معاهم "ومن مات دون نفسه فهو شهيد" (حديث) .. يعني مش بيعملوا حاجة حرام وتعاطفك مش حيرجعلهم أرواح وإنت قاعد في بيتك وهما يا عيني صعبانين عليك..
طب سيبك من النهضة..رابعة مسلحة..ده أكيد..إنت كويس بس هما لأ
- هو إنت جيت ؟
لا
- أومال بتقول مسلحة بناء على إيه ؟
بيقولوا كده
- مين بيقولوا ؟
الإعلام
- بتصدقهم ؟
لأ بس بردو مابصدقش الإخوان
- طب ماتيجي تشوف إنت بنفسك !
إن شاء الله آجي
- أهلا وسهلا
------------------------------------------
نقاش ثاني:
ربنا معاكو يا معلم، إنتو تمام ؟
- الحمد لله، إيه مابتفكرش تيجي رابعة تتفرج حتى بما إنك شاركت ف الثورة
لا والله أصلي بردو مش عارف أنزل ليه، يعني ماشي إنقلاب وبتاع بس إيه الضروري إني أنزل يعني ؟
- الضروري إن ده إنقلاب على صوتك .. إنت نزلت ف الحر إستفتائين وتلات إنتخابات بإعاداتهم وقفت بالساعات عشان تقول صوتك وعملت ثورة عشان تيجي ف يوم تلاقي الداخلية والمخابرات ورجال مبارك كلهم بالكنبة اللي كانوا بيشتمونا نازلين مع شوية الثورجية بتوع السبوبة يسقطوا كل ده وآديك شايف كله دلوقتي بالتعيينات ولا إنتخابات ولا يحزنون..
قمع وغلق قنوات وصحف وإعتقالات بدون أمر من النيابة وزي أيام عبدالناصر مش مبارك حتى..
التلات وزرا اللي كانوا عاملين عليهم مشاكل أيام مرسي هما الوحيدين اللي موجودين لحد دلوقتي..والمشاكل إتحلت (الداخلية، الطاقة، الكهرباء)..
وبعدين أنا نفسي افهم .. مرسي إتقبض عليه من هنا وكل جرايمه طلعت فجأة كده ! يعني تخابر مع حماس (جريمة) وفلوس سارقها وكل ده بعد الإنقلاب ؟ طب طالما هو فاسد كده إيه لازمة ال48 ساعة وكل العك ده...ما كان بمنتهى البساطة القضاء يدينه ويقلبوه بالقانون ؟ ولا هما مستنيين إنقلاب عشان يطلعوا أوراقهم وهما أصلا معاهم كل المؤسسات ومرسي بالنسبة لهم فرد لا راح ولا جه !
أيوة أنا مقتنع بكل ده بس بردو لسه مش حاسس بالخطر اللي يخليني أنزل وأطالب بإسقاط العسكر لدرجة إني أموت.
- طب وعشان تحس بالخطر مستني إيه أنيل من كل ده ؟ عموما براحتك ..جايز الخطر تحس بيه لما يجيبوك من بيتك شخصياً !
-----------------------------------------
نقاش ثالث:
بصراحة يعني مرسي هو السبب..هو ليه يعني ماعملش إنتخابات مبكرة وكان أغنانا عن كل ده ؟ ولا إستفتاء على وجوده ؟
هو لو مرسي كان عمل إنتخابات مبكرة مثلا ودخل تاني فيها وكسبها كانوا حينبسطوا ؟
أيوة
- ليه مش إنت بتقول إنه كان بيضيع البلد ؟ يعني لو كسب تاني حيسيبوه يضيع البلد ؟! بلاش يا سيدي ..نستثني مرسي (مع إني مش عارف دستوريا إزاي نقدر نمنع مرسي من عدم الترشح في أي إنتخابات مبكرة) بس نستثني مرسي..تقدر تقوللي لو الإخوان كانوا رشحوا الشاطر مثلا أو أبو إسماعيل وكسب حد منهم كانوا إنبسطوا ؟! أكيد لأ لأن مشكلتهم مع التيار الإسلامي ككل..
وعلى كلٍ يا سيدي لو إفترضنا إنك صح..إنتخابات مبكرة والشاطر كسب وبعد سنة إكتشف الإعلام "الجهبذ الوطني" إنه بيبيع البلد يقوم يعمل إنتخابات مبكرة تاني وهكذا ؟
أومال نشيله إزاي ؟
- بالإنتخابات زي ما جِه
يعني هو بيضيع البلد وبيبيعها وعايزنا نسيبه كده لحد مايخربها 4 سنين ؟!
- لا طبعا..فيه إختراع في أي بلد في الدنيا إسمه مجلس شعب..وده اللي يحدد سواء كان الرئيس ده فاشل ولا بيبيع البلد وبيضيعها ولا لأ مش الإعلام الممول من الخليج وأمريكا اللي حضرتك ماشي وراهم وهما اللي قالولك إن مرسي باع قناة السويس لقطر وإدى البنزين لغزة اللي قد "مصر الجديدة"...
- تقدر تقوللي حضرتك طالما نزل 33 مليون واحد يسقط مرسي (يعني الكتلة الإنتخابية في مصر تقريبا) ليه ماتعملش إنتخابات تشريعية وتدخل تسقط مرسي بالقانون والدستور ؟ ده إنت تكتسح بال33 مليون دول !
- وبعدين مين أصلا وقف ضد الإنتخابات التشريعية ؟ مش الأحزاب الخايبانة اللي بتدعي إنها لها شعبية والناس معاها ؟ مش قالوا ماخدناش وقتنا ف 2011 ؟ 3 سنين أهو ولسه ماخدوش وقتهم ؟!!
- ومين كان بيصر إنها تحصل ؟ مرسي كان مُصر إنها تحصل وهما عطلوها وفرحوا لما اتعطلت ومجلس الشورى كان بيشرع بعض القوانين تمهيداً للإنتخابات بعد 3 شهور ..مش قادر تصبر 3 شهور وبعدها تسقط مرسي وحكومته والدستور اللي مش عاجبك ؟ ولا لازم بالدبابة ؟
الخلاصة إن ماحدش طلب منك تستنى 4 سنين...بل 3 شهور ولو كنت عملت إنتخابات تشريعية ف معادها قبل ما الدستورية تلغيها كان زمان عندك مجلس شعب وانت مكتسح فيه بما إن شعبية مرسي والإخوان بقت ف الحضيض كما زعمت..وكان زمانك سحبت منهم جميعا الثقة وحاسبتهم على فسادهم المزعوم..وأبطلت دستور (الإخوان) زي ماقاللك الإعلام.
طب إنتو عايزين إيه وإيه آخرتها وحتمشوا إمتى ؟
- الإجابة هي هي نفس الإجابة اللي كنا بنجاوبها ف ال18 يوم بتوع الثورة بالحرف
- الإجابة هي هي نفس الإجابة اللي كنا بنجاوبها ف ال18 يوم بتوع الثورة بالحرف
Posts
4 comments:
لا يمكن أن أكون مثل محمد مرسي الذي أقسم بالله العظيم على الدستور ثلاث مرات ثم انتهكه بإعلان دستوري استبدادي
إن كنت ضد الدستور فلن أقسم بالمحافطة عليه وأنا أنوي تغييره
ثم إن أي حاكم تسقط شرعيته عندما تسقط الدماء فلا يحاسب أحدا ولا يحاكم ولا يقيل ولا يستقيل بل للأسف يمدح القتلة ويكذب ويصفهم بأنهم في قلب الثورة
هل تنتظر من محمد مرسي إن عاد للرئاسة أن يحاكم السيسي وهو الذي كرم الطنطاوي وعنان
وهل تنتظر منه أن يعيد هيكلة الداخلية وهو الذي مدحها
وهل تنتظر منه أن يحقق وعودا أخرى وهو لم يوف بوعد مثل وفائه بوعد الإبقاء على اتفاقيات السلام مع الصهاينة حتى يمكن اعتبارها مادة فوق دستورية
لو أن الذين أقاموا الدنيا الآن وحركوا كل مناصريهم في أنحاء الأرض وقفوا ضد جرائم الطنطاوي وعنان ومرسي ما وصلنا إلى هذا اليوم لكنهم صمتوا على الظلم فنالهم نصيبهم منه
هل أنت ضد الظالم والقاتل والمجرم
وهل أنت ضد من يمدح الظالم والقاتل والمجرم
لو كنت كذلك فلن تكون مؤيدا لمحمد مرسي
يأيها الذين آمنوا اتقوا الله وكونوا مع الصادقين
رد الله أهل الحق إلى الحق ردا جميلا
لا طبعا مرسي وحش وشرعيته سقطت مع أول قطرة دماء لكن السيسي جابلنا حقنا وحيحاسب القتلة ويرجع حق الشهيد...وشرعيته ماسقطتش بعد بحر الدماء دي..
لا تعليق
من تحدث عن أي شرعية للسيسي الذي كان ضمن المجلس العسكري المجرم واختاره محمد مرسي مع ذلك وزيرا للدفاع
لم أمدح السيسي
من مدحه هو محمد مرسي وإخوانه واعتبروه وزيرا بنكهة الثورة
فقف ضده وضد كل ظالم ومؤيد للظالمين
شاطر برافو عليك...وانت بتقف بقى في وش السيسي ولا قاعد ف بيتكم لحد ما الإخوان الوحشين يروحوا الأول وبعدين تنزل ؟
Post a Comment