ميادين المعادي

السلام عليكم ورحمة الله وبركاته

فكرت الأول إني أفكر لوحدي وأكتب الفكرة كاملة, بس لقيت نفسي وقفت ومحتاج تحفيز ومراجعة وتصحيح

مبدئيا المشروع ده ممكن نسميه:  فني, جمالي, عمراني, تنموي, بيئي, مستدام....

اللي عاوز أعمله هو عملية تحويل الأماكن الغير مستغلة في المعادي لأماكن مستغلة بشكل تنموي.....

إزاي ؟ أي مكان زي مثلا: ميدان أو جزيرة أو حديقة أو حتى رصيف بايظ وغير مستغل ومساحته كويسة ....طبعا بايظة ومليانة "قمامة" وكده ومش مزروعة ولا مِتسَوّرة.....الأماكن دي هي شغلنا ...إزاي نستغلها كمشروع تنموي ؟

عندنا في منطقة المعادي 3 مستويات "وغالبا هتلاقيهم في كل منطقة مع اختلاف حجم كل شريحة أو مستوى"

الشريحة الأولى: أغنياء منهم رجال أعمال وسيدات بيوت (هذه الفئة تتميز بالقدرة المالية أكثر من المجهود الذاتي أو العضلي)

الشريحة الثانية: طبقة وسطى تعمل ولا تعمل (قدرة عضلية ومادية متوسطان) لكن يمتلكوا مهارات "كلٌ حسب مهنته"

الشريحة الثالثة: طبقة فقيرة تعمل ولا تعمل (قدرة عضلية عالية ولا يوجد قدرة مادية)

الفكرة من الجانب المادي والجمالي والبيئي هي: إننا ناخد من فلوس الغني اللي ماعندوش وقت لعمل خيري (وطبعا بعد ما نوريله الفكرة بطريقة شيك ونفَهِّمه قد إيه المعادي هتبقى جميلة لو ساعد- يعني بُعد إنساني وبُعد جمالي) عشان يحس إنه هيدفع في شيء يستحق

البعد الإنساني والتنموي: نبدأ نجيب الناس (من الطبقة الفقيرة اللي فاضيين ومعهومش فلوس) ونقول له لو اشتغلت معانا في الشغلانة دي (بالقطعة) هنديك (كذا)

إيه هي الشغلانة : تنظيف ثم احياء/تجديد/انشاء هذه الميادين/جزر/أرصفة لتكون فيما بعد أماكن ترفيهية (للأغنياء) وأكشاك (مثلا للفقراء) ومشاريع أخرى (مثل: حدائق أطفال, مكتبة...إلخ) وأماكن للتجمع لأعمال خيرية أخرى....زي مثلا نقول إننا إنتهينا من تجديد المكان الفلاني وبمناسبة تجديد هذا المكان نحب نعمل احتفالية فكل واحد ييجي يومها المكان ده معاه (فلوس/لبس/كتب/ أي شيء) يتبرع بيه للمشروع اللي بعده أو لأهالي المنطقة الفقرا وهكذا بحيث يبقى المشروع: تنموي جمالي عمراني بيئي ومستدام ويعمل فيه جميع الطبقات

دور كل فئة:

المقتدرين هيساعدوا بفلوسهم وأفكارهم إن أمكن

الفئة المتوسطة هتشتغل في الدعاية (عن طريق النت وعن طريق بروشورات وفلايرز تنتشر في المعادي لتعريف الناس بالمشروع بشكل حديث وسهل وجذاب) عشان يوصل لأكبر نسبة متبرعين بشكل يحسسهم إن المعادي هيكون شكلها أجمل وهتعود على كل واحد فينا, غير إن الفئة دي طبعا هتبذل مجهود في الإشراف على كل اللي هيتم ابتداء من اختيار المكان ولم الفلوس واختيار العمال ثم الإنتهاء من المشروع) ده غير لو حد معماري أو فنان تشكيلي أو بيرسم أو يقدر يساهم بأي شكل في التجديد أو الإنشاء ده طبعا هيشارك..

الفئة البسيطة هي اللي هتعمل في العمل العضلي سواء تنظيف أو تجديد أو ترميم أو دهان إلخ بمساعدة الفئة المتوسطة لتقليل الفجوة الإجتماعية ثم تعود المنفعة المادية لهم (الطبقة البسيطة) على هيئة فلوس كسبوها بمجهودهم

دي مسودة فكرة مبدئية, بنفكر مع بعض ويا رب يوفقنا للخير دايما

آراءكم ومشاركتكم مهمة

شكرا :)


الصفحة على الFacebook
http://www.facebook.com/pages/%D9%85%D9%8A%D8%A7%D8%AF%D9%8A%D9%86-%D8%A7%D9%84%D9%85%D8%B9%D8%A7%D8%AF%D9%8A/375858745776695